Wä denne paar Johr

Wä denne paar Johr wu mer lebt uff de Welt
do soll mer sich schinne un plooche . . . ?
Ich peif was uff Reichtum, uff Mammon un Geld
am Schluss is mer doch bloß betrooche.

Was nützen Gepränge mit Titel un Sold,
Gewänner aus Sammet un Seide . . . ?
Gesundheit is mee wert wie Reichtum un Gold,
des werd mer wohl keener beschdreite.

Wie gut hots de Mensch mit bescheidenem Ziel
wu Grenze sich setzt in seim Schdrewe,
un gönnt vun sich selwer eme annre so viel
damit aach sein Mitmensch kann lewe.

Des is jo die Krankheit wu alles zersetzt,
wu mancher dra schdolwert un scheitert:
Er werd vun seim eigene Geiz bloß gehetzt
anschdatt vun seim Lewe erheitert.