Als wetterfeschter Pälzer Zecher,
als froher Mensch un Sorgebrecher,
do schwör ich druff un g'schdeh 's aach ei,
ich trink so gern de Pälzer Wei.
De Pälzer Wei macht froh un schlank,
do bleibscht gesund un werscht net krank,
griehscht rote Backe, werscht net blass,
bleibscht munter, hoscht am Lewe Spass.
Er gäbt uns Kraft un halt uns warm,
des macht de beschte Dokder arm.
Un weil er uns so luschdich macht,
gar feirich unser Herz entfacht,
nemm ich mei Pälzer Schobbeglas
un halt mer 's langsam an die Nas,
damit mer aa was schniffle duht,
denn Pälzer Wei riecht werklich gut.
Do strahlt die Sunn so goldich raus,
und die häält eem als richtich aus
un macht uns frei vun alle Runzle.
Ich sieh 's schun wie se all jetzt schmunzle
un wie se frohe G'sichter griehn,
weil se de Schobbe vor sich siehn.
Do sin se in ehrm Element
un jeder wu die Pälzer kennt,
der wääß, dass die sich gut benemme
un froh un stolz ehrn Schobbe stemme.
En Pälzer uhne Pälzer Wei,
des kann doch gar keen Pälzer sei!
Un ich saa immer, in mein Hals
Kummt nore Wei aus unsre Palz.
Nix annres gäbt 's, nix annres duld ich,
des sin mer unsre Winzer schuldich.
Meer lossen uns vum Wei begeischdre,
so kammer ´s bescht sei Schicksal meischdre.
De Pälzer Wei gäbt Mut un Kraft,
dann klappt aach alles, was mer schafft.
Mer fiehlt sich wohl un bleibt in Schwung,
des stimmt eem froh un halt eem jung.
Beim Wei blieht Frohsinn un Gesang
un wer lang trinkt, der lebt aach lang.
Un is en Mann gesund un alt,
dann hääßt 's. denn hot de Wei erhalt,
der is so zäh wie Reweholz,
des is de ganze Winzerstolz.
Do gilt aach noch de Winzerschwur:
De Wei is dorch un dorch Nadur!
Im Wei leiht Wohrredd, saat mer als,
un des muss stimme in de Palz.
So wie re wachst, so wolle mern trinke,
dann duhn uns scheene Stunne winke.
Die Pälzer sin uff Wei geeicht,
wer Wasser trinkt g'hört aagezeicht.
Wer Herz un Sinn hot for de Wei,
des kann en guter Mensch nor sei,
un gute Wei un frohe Leit,
die braucht mer dringend nötich heit.
Damit mer's Lewe recht gestalten,
uns gut vertraan un z'sammehalten.
Es Glas in de Hand, die Zung als im Wie,
des kann doch nore en Weibruder sei.
De Pälzer Wei gäbt Kraft und Mark,
do werd mer wie en Löb so stark.
Der weckt eem uff un halt eem hoch
un basst zu unsre Pälzer Sprooch,
damit mer bleiwen wie mer sin.
Im Wei steckt Kraft un Sege drin,
drum saa ich immer, "hoch die Glässer,
die Winzer brauchen leere Fässer!"
Un grad so schee wie Sunneschei,
des is en Schobbe Pälzer Wei.
Der treibt die dunkle Wolke fort.
Die Hand uff's Herz, de Wei halt Wort.
Un gäbt eich ´s Lewe mol en Tritt,
trinkt Pälzer Wie, do bleiwener fit!