Schoppeglas un Schwartemage

Schoppeglas un Schwartemage, gell, do guckscht, do machschte Aage. Grad des Buch hat uns gefehlt, wu die Pälzer Feschte zählt. ´s is e scheenes Buch, net deier, vorne siehscht de Dom vun Speyer, Fahne, Leit un Trummelschläger un die viele Brezelträger. ´s Buch hääßt: Pälzer Fröhlichkeit. Jeder wääß was des bedeit, ´s duht uns uff de Worschtmarkt fiehre, kannscht de Truwel förmlich spiere, ´s is es gröschte vun de Feschte, dort schmeckt aach de Wei am beschte. Deidesem is aach beschriwwe un kee Wort is iwwertriwwe. ´s dreht sich alles um de Bock un punkt sechse lait die Glock, wer dann Glick hot, hot gewunn. Horch, de Bock, der meckert schun. Dann geht´s luschdich weiter glei, Billigheim is an de Rhei, - alte Braich aus alter Zeit, des macht Spaß, ehr liewe Leit. Dann kummt Neustadt, `s Fescht vum Wei, ´s gäbt em Herbscht de Glorieschei. Noch e Fescht kannscht froh genieße, wu de kannscht mi´m Blosrohr schieße, ´s is als Böhämmerfescht bekannt, werklich, des is intressant. Kummt de Mai, dann geht´s uff Lautre, hinnerpälzisch kannscht dann plaudre. `s kummen Leit vun iwweraal, `s is halt international, net allä wä´m Maifescht bloß, ´s is aach dorch de Fußball groß. Schifferfeschte, Fischerfeschte, feiert mer am Rhei am beschte. Neuburg, Roxem net vergesse, laden ei zum Fischeresse. Luschdich geht´s in Kerchem zu, Residenz, voll Pälzer Ruh. Bockrem zeigt sei Winzerbilder un en scheene Herbscht, en milder. Königinne, Sänger, Dichter, sin dort altbekannte G´sichter. Kandel feiert Freindschaftsfeschte, des is an de Grenz es beschte. Kandel is de rechte Ort. Freindschaft is e gutes Wort. Ludwigshafe, was e Ehr, macht sein Park zum Lichtermeer. Loschter Handkees mit Musik, der gehört zum Pälzer Glick. Forscht macht uns zum Friehling Mut mit sei´m Hansel Fingerhut un de Hennerich-Fähnrich geht mit de Forschter Nudelgret. Mannelbääm un Gimmeldinge wollen uns de Friehling bringe un de Philp, de Schorsch, de Franz danzen dort ehrn Rüpeldanz un die Mannelblütemäädcher, traan so scheene Trachtekläädcher. Alle Bilder jedenfalls fiehr´n uns dorch die fröhlich Palz. Freensem, Grünstadt, Kusel, Haardt, zeigen Feschte, pälzer Art. Dermstee, Landstuhl, Alseborn, nemmen alte Braich uff´s Korn, Annweiler un Edekowe, alle Feschte sin zu lowe. Landau duht die Blumme preise un de neie Fedderweiße. Wolfstee fiehrt die Maikur vor. Rockehause feiert kloor. Dann stellt aach des Buch noch raus unser Kerb mi´m Kerwestrauß, Summerdag un Hexenacht, - mancher Danz werd do gemacht, Mölschbach mit em Pingschtquack-Trupp un die Pälzer Metzelsupp.