An alle Stroßeecke gäbt's jetzt Keschde
als Herbschtgruß aus em scheene Pälzer Wald.
An jedem Marktdaa un an alle Feschte
werrn Keschde aagebott, geröscht un kalt.

Zu jedem Esse duht mer Keschde mache,
die gäwwen jo dem Ganze erscht de Glanz.
Mit Keschde macht mer jetzt die beschte Sache,
mer fillt mit Keschde aach die Martinsgans.

Schun wan se reif werrn, ach, des is e Wunner,
die Kinner schiddeln se als vun de Bääm
un schlaan se mit de Stecke owwerunner,
dann bringen se als ganze Säck voll hääm.

Am annre Daag, do stehn se an de Stroße,
verkaafen als die Keschde Pund for Pund.
Die kleene Kinner machen 's wie die Große,
un rufen: "Pälzer Keschde sin gesund".

Ich glaab, in jedem Haus, do gäbt 'sjetzt Keschde,
wann ´s Rotkraut gewwe duht un Gans un Wild.
Zum neie Wie, do schmecken se am beschde;
Des is im Herbscht e scheenes Pälzer Bild.