Es schenschte Fescht vum ganze Johr,
des is die Kerb, mit viel Humor.
Do werrn sich scheene Daa gemacht,
's werd gess', getrunk un viel gelacht.
's geht rund bis in die Nacht enei,
mer singt un trinkt sein Kerwewei.
Die Musik spielt, mer hört's wie weit
un 's werd gedanzt, des g'fallt de Leit.

Die Frääd, die gäbt uns neii Kraft,
damit mer werre liewer schafft.
Un wann de saa kannscht, heit war's klor,
do kummscht der vor wie nei gebor
un määnscht du wärscht de Hans im Glick,
sei froh, des is e Meeschterstick.
Warum dann bloß sei Geld versteire,
wer g'schafft hot, hot aach Grund zum Feire.

Ich bin begeischdert, ich g'steh 's ei
vum Kerwefescht un vun seim Wei,
vum Schwung un vun de frohe Leit
un vun de scheene Kerwezeit.
Solang uns noch de Schobbe schmeckt
un Gottes Kraft noch in uns steckt,
solang 's noch ebbes gäbt zum Lache,
soll 's Kerwefescht viel Frääd uns mache.