Unser Fasnacht bringt for alle
Frääd un Frohsinn do beim Wei,
deswää hän aach alle Pälzer
froh un närrisch jetzt zu sei.

Frohsinn basst zum Pälzer Lewe,
un in denne Winterdaa
hot mer Zeit un kann de annre
mol sei Meenung richtich saa.

Awwer 's muss was sei zum Lache
un zum Schmunzle, wie mer saat,
dann des wääß mer, bei de Pälzer
zählt keen Menschwas, wu bloß klaat

Luscht un Frohsinn kann bloß nitze,
de Humor gäbt Kraft un Mut,
do brauchscht bloß die Ohre spitze,
in de Palz do lebt sich's gut.

In de Palz, do is die Fasnacht
ewe wie se noch soll sei.
Kee Gedääns un kee Mengenges
strään do Sand ins Triebwerk nei.

Deswää redd mer aach noch Pälzisch,
Fasnachtskichelcher gäbt 's do viel,
mer verklääd sich un duht singe,
lebt noch ganz noom alte Stil.

Pälzer Fasnacht is noch Fasnacht
wu mer frei un froh sei kann.
Keener macht do große Bosse,
awwer jeder stellt sein Mann.

Unser Fasnacht is noch luschdich
un lewendich, hot noch Schmiss,
wie se war, drum saa ich immer,
loss se bleiwe wie se is.

Jeder soll sei Meenung bringe,
was eem drickt als do un dort.
Doch es schenscht vun alle Dinge
is un bleibt e gudes Wort.