Allmählich gehts eem Winter zu,
Es is schun trüb un kalt...
Die Welt erschdarrt in schdiller Ruh
Un schlooft in Feld und Wald.

Wie gut e bissel Sunn eem dut
Wann's sich zum Vorschei traut,
Noch halb verdeckt dorch Feiersglut
Un Raach vum Krumbeerkraut.

Die Äcker lein schun brooch un leer
Un aach die Bääm schdehn kahl
Verschwumme halb im Newelmeer
Als gäbs kee Berg und Daa.

Es geht jetzt uff die Wintersnacht
Un's Johr klingt langsam aus...
Bis werre die Nadur erwacht
Is halt e langi Paus.