Es gebt e Zeit im Lewe
do is mer sorgefrei . . .
Do traan die annere ewe
dei Sorge noch debei
zu ihre eigne Sorge,
un des is garned leicht.
0 goldner Kinnermorge,
uns unbewusst gereicht.

Heit kann ichs erschd ermesse
was des for Ufgab is,
drum kann ich ned vergesse
mei Kinnerzeit gewiss.
Mein Lehrer vun de Schul
seh ich drum heit noch immer
dort sitze uff sei'm Schduhl
vorm Disch im Klassezimmer.

Die Ufsätz korrigiere,
es Rechenheft zur Hand
um Fehler noozuschpiere,
notierend was am Rand,
Gedichte vorzutraa,
sich prüfend umzuseh,
so seh ich alle Daa
mein Lehrer vor mer schdeh.

Dorch all die Jugendjohre
hot er uns trei gelenkt,
un hot mit manchem Wohre
fors Lewe uns beschenkt;
im Rechne, Lese, Schreiwe
belehrt uff Schritt un Tritt,
´s därf keener sitze bleiwe
war 's Mahnwort allerit.

Als wär des Glück unendlich,
die Schulzeit ging ned rum,
so hot mer selbschdverschdändlich
des alles hingenumm.
Mer hot geglaabt de Lehrer
wär dodefor jo do,
als Lehr- und Weisheitsmehrer
un war vergniecht un froh.

Erschd heit no langem Schdrewe
werd deitlich mer des klar
was domols for mei Lewe
die Schulzeit eigentlich war.
Meim Lehrer Dank zu säe
in meim Beschdrewe schdeht,
es werd en sicher fräe,
kummt aach de Dank erschd schpet.