Es is en Jammer, eijeijei,
dort in de Kammer leiht mei Gei,
verstaabt, verstimmt, mer losst's kee Ruh,
es Schloss vum Kaschte roscht ball zu.

Bin anno Fuchzeh schun gebor'
im erschte Weltkrieg, stell'n eich vor,
un zeh Johr speeter, wie's gedenkt,
hän's Schindlers mer die Gei geschenkt.

Solang hab ich die Gei jetzt schun,
sie war mein Freind zu jedre Stunn,
hab druff gespielt in Frääd un Lääd,
bei Fescht un Danz, for Borsch un Määd.

Erscht hab ich bloß druff rumgekratzt.
Die Saite waren ball verplatzt.
Ganz ferchterliche Tön hot's gäbb.
Am Aafang geht halt manches schebb.

Doch ball deno do bin ich lang
zum Fischer in die Geistunn gang,
hab als e Mark bezahlt in bar,
dort war'n die Penninge noch rar.

Hab C D E F G geiebt,
es Geispiel war dort noch beliebt.
Oft war's aach schwer for mich, ich wääß,
"Geh ab du Esel," hot's dann g'hääß'.

Doch immer bin ich werre kumm
un hab mei Geijestunn genumm,
de Boo gestrich, ich war noch jung.
Uff eemol hot's ganz schee geklung'.

Dann hän mer e Kapell gegrind.
's is schee, wer Gleichgesinnte find.
Hän froh gespielt, mit viel Humor
un hän als noch was grieht defor.

Bis uns de Krieg hot nausgetribb.
Doch is mei Gei dehääm geblibb
un is seit sellere Zeit verstummt
un leiht im Kaschte, ganz vermummt.

's is nix mee wert des Instrument.
Doch meenscht, dass ich mich trenne kennt?
Do wär mei Herz so schwer wie Blei,
so häng ich an der alte Gei.