Die erschte reife Kersche duht mer breche.
Ball klabbern aach im Wald die Hälbeerbleche.
Die Hännler rufen werre: "Kobbsalat,
Radiesjer, zarte Reddich, Spargele, Spinat."

Un dann, die Erdbeere, die scheene, rote,
sieh'n aus als wärn se for e Lied die Note.
En Klang wie so e Sinfoniekonzert
geht fröhlich dorch die Palz, wann 's Summer werd.

De Cyriakus losst die Wingert bliehe.
Johannisfeier uff de Berge gliehe,
un manches Paar, wu iwwer 's Feier springt.
hofft, dass de Summer Glick un Sege bringt.