iwwer de sinn vum lewe

Im Alter, am Owend do hot mer de Zeit
zum Noodenke was unser Lewe bedeit.
Dann denkt mer zurick an die Zeite, die scheene,
die wu mer verlebt hot mit Lache un Träne,
an Höhe un Diefe, an Not un an Lääd,
an Ach un an Weh un an Glick un an Frääd. Im Alter, am Owend, vergold sich die Zeit,
do sucht mer de Friede, do will mer keen Streit.
Jetzt steht mer vorm Ziel halt en Spichel sich vor,
was hot mern gewunne, was hot mern verlor?
Mer denkt wie im Traam ans Vergangne zurick,
an droschtlose Stunne un Stunne voll Glick. Im Alter, am Owend, bedenkt mer die Zeit,
die wu mer verlebt hot un was se bedeit,
un froot sich, war's wert sich ze schinne, ze queele,
dann Reichtum, Brilljante un Ring duhn nix zähle
dort owwe, beim Herrgott, vorm jingschte Gericht,
do kannscht nix verhehle, 's kummt alles ans Licht. Im Alter, am Owend, do wääß mer, die Zeit
zum Lewe war korz, 's is kee Ewichkeit,
un is se verrunne, dann schließt sich de Ring.
Jetzt möcht mer so manches noch mache, wann's ging.
Doch hot mer sein Glaawe, dann wääß mer wie 's steht,
mer soll sich noch frääe, solang wie 's nor geht.