Die Krumbeersäck wern vollgestoppt,
die Niss wern vun de Bääm gekloppt
un falln mit viel Geklapper runner,
e Määdche halt sei Scherzche drunner,
als wollt´s de Herbscht ins Scherzche duh,
sei Herzche kloppt de Takt dezu.

Die Krumbeerstrunke steckt mer aa´,
die Buwe hän ehr Frääd do draa´,
´s macht Spaß im Raach erum se springe,
die Säck se traa, e Lied zu singe
un Krumbeer´ schmore in de Glut,
verkohlte schmecken doppelt gut.

Die Wingert hän ehr große Daa.
De Kräftigscht muß die Logel traa.
Die Plackerei is schnell vergesse
beim Lese un beim Trauwe esse.
Die Stare hausen machmol bees.
Zum Veschperbrot gäbt´s Worscht un Kees.

Mit volle Bütte fahrt mer heem.
Es letschte Obst fallt vun de Bääm.
Die Bauersleit ehr Urdeil fällen.
Die Flinte knall´n, die Jagdhund bellen.
Mer steckt sich Herbstlaab an die Kapp.
Die Reiter halten Fuchsjagd ab.

de Wald färbt immer mee sich ei
un glänzt wie Gold im Sunneschei.
Es gäbt schun Bitzler zu de Keschte,
de Herbscht bringt uns noch scheene Feschte,
des is bei alle Pälzer so,
trotz Mieh un Ärwet sin se froh.

Es Sauerkraut wird ei´gemacht,
mer riecht´s Gewerz, ball wird geschlacht,
mer muß aach an de Winter denke,
un Ei´gemachtes braucht mer aach,
es Lackflääsch kummt dann in de Raach.

Die Daa hän merklich abgenumm´.
Die Kinner traan Laderne rum
vun ausgehehlte Runkelriewe,
´s wird Zeit, de Richel vorzuschiewe,
die Nachteil kummt, un kalt wird´s glei.
O liewer Herrgott steh uns bei!