Heit grien die Männer eener druff,
heit hän se nix zu lache,
heit klär ich mol die Weibsleit uff
was die for Bosse mache.

Es Geld verbutzen se, ´s is wohr,
vum viele Wertshauslaafe,
anschdatt eich neie Hüt defor
un Schuh un Schdrümp zu kaafe.

Dann bilden sich die Männer ei
wann se die Nacht dorch tanke
müssten die Weibsleit stolz druff sei
un dodefor noch danke.

Braucht awer mol die Fraa e Klääd
do dun se jammere, dowe . . .
doch bei de annere junge Määd
dun se die Mode lowe.

Des muss mer sich mol üwerlee
was die - eich Unschuldsengel –
eich arme Weibsleit hinnergeh
die böse, freche Bengel.

Wann ich e Fraa wär: Frei un frank
tät ich die Männer meide,
die Weibsleit grien jo doch keen Dank
un müssen zuviel leide.