Wie ich klee war, an de Fasnacht,
bin ich gang' vun Haus zu Haus,
hab gesunge un gerufe,
gewwen mer e Kichel raus:

Fasnacht, die Pann kracht,
die Kichelcher sin geback,
eraus mit, eraus mit,
ich steck se in mein Sack.

Erscht allee un dann zu zwätt
un zu dritt, dann immer mee,
sin mer gang' vun Deer zu Deer
un hän g'sunge, laut un schee:

Fasnacht, die Pann kracht,
die Kichelcher sin geback,
eraus mit, eraus mit,
ich steck se in mein Sack.

Wann ich Kichelcher hab grieht,
des war immer schee gewess
un no jedem zwätte Lied
hab ich eens devun als gess:

Fasnacht, die Pann kracht,
die Kichelcher sin geback,
eraus mit, eraus mit,
ich steck se in mein Sack.

Die Gesichter war'n vermolt,
alle Farwe hot mer g'sieh'.
's war for mich e großi Frääd
un den Spruch vergess ich nie:

Fasnacht, die Pann kracht,
die Kichelcher sin geback,
eraus mit, eraus mit,
ich steck se in mein Sack.

Un aach heit noch, wann ich's heer,
mach ich weit die Hausdeer uff.
Kinner, es gäbt Kichelcher,
kummen nor', ich waart schun druff:

Fasnacht, die Pann kracht,
die Kichelcher sin geback,
eraus mit, eraus mit,
ich steck se in mein Sack.