Was is dann heit bloß los?
Die Welt schdeht uffem Kopp.
Drum geb deim Herz en Schtoß
un sei keen Trauerknopp.
Mach mit, sei ned meschugge
versetz dei goldni Kett
die Welt wär viel zu drucke,
wann mer kee Fasnacht hett.

Was wär die Welt so schee,
wann immer Fasnacht wär.
Mer hätt kee Sorge mee
un ´s Lewe wär ned schwer.
Mer breicht kee Schdeier zahle
un ´s gäb aach keen Bankrott,
do kennt e jeder schdrahle
un wärer noch so blott.

Was morje kumme kann
des wäß mer heit noch ned.
Mer wäß bloß dann un wann
do griet mer als sei Fett.
Drum du dich ned scheniere
un setz dich ned uffs Geld
e jeder soll heit schbiere
Humor regiert die Welt!