e esse

Es Esse ned vergesse
sunschd werd mer dünn un blass.
Ich halt gar viel uffs Esse,
am Esse hab ich Schchpass,
ned bloß an hohe Feschde
un wann d' Geburtstag hoschd . . .
Bloß schmeckt mer halt am beschde
E echti Pälzer Koschd.
Zum Beispiel so e Rippche
dorchwachse schee un fei
mit Sauerkraut im Dippche
un noch e Gläsel Wei.
Des dut mich als kuriere
vum Kopp bis an die Zeh.
Beim Esse sich scheniere
des wär e großes Weh.
Ich halt ned viel vum Schmachte
--- So for en hohle Zah´ ---
Schun morgens frieh um achte
fang ich mit Kotlett aa.
Un hab ich des begrawe
dann grie ich Appetit
an Brodworschd mich se lawe,
des gebt jo erschd de Kitt.
Ihr wisst, en Sack en leere,
bleibt vun allee ned schdeh
un deswä mei Begehre
mich ordentlich zu nee.