Ich hab mer oft schun üwerleet
wieso sich 's meischd um Pälzer dreht,
warum die Palz die Erdax schmeert
un's Pälzer Volk so schdark begehrt?

Des hot sein Grund so denk ich als
un lob mei liewi, scheeni Palz.
Mer braucht keen Filosoof zu sei,
Do fallt eem schun es Rechte ei:
Dann 's is halt so, die Pälzer Rass
is tüchtich un sie kann aach was.

Sie hots verschdann de Wei zu baue
Un aach e gudes Bier zu braue;
Planzt Duwak, Zwiewel un Gemies
Un macht die Palz zum Paradies.

Die schenschde Feschde wu mer kennt:
Ob mer se Worschdmarkt, Kerwe nennt,
Frooch wen de willschd, wu gebts dann die?
Bloß in de Palz, so wie ich sieh.

Die Palz hot dausendfach Diplome,
die gröschde Burge, ältschde Dome,
die schenschde Wälder un die beschde,
warum do wachsen Pälzer Keschde;
un aach die Felder bliehn so schee,
doch sowas wachst ned vun allee.
Do braucht mer Pälzer - Pälzer Leit -
wu helfen, dass de Kram gedeiht.

Un was die Pälzer selbschd betrifft,
des lest mer jo in jedre Schrift,
dass ich als selber schdaun un horch:
Die sin jo wie e Blosrohr dorch.

Un aach in punkto Lieb un so . . .
do sin die Pälzer frei un froh.
Die machen halt kee große Ferz
un reden frisch ehr Lieb vum Herz
un schdellen sich de Mädcher vor
so wie se sin halt: derb un kloor.

Un sitzen se am Schdammdisch friedlich
do wern se dann erschd recht gemietlich,
so dass mer fiehlt sie sin gebor
for Wei un Witz un Palzhumor.

Die Pälzer machen niemols Krach,
sie schlaan sich högschdens was uffs Dach
un sin sich wider eenich . . .
des fräät eem wie en Keenich!