Was ist dann mit de Gondelbahn?
Die abzubaue wär en Wahn.
E Sach, wu soviel Fräät duht bringe
un nitzlich is vor alle Dinge
un intressant for Jung un Alt
un wichtich is for Derkem halt,
die soll mer werklich gut behiete.
Als Kurstadt muß mer doch was biete.

Ich hör so oft in Ludwigshafe,
die Gondelbahn soll werre laafe.
Aach ich meen als es is verkehrt,
daß manchen so was Scheenes steert.
Des is des was mer net gefallt.
Uns nitzt doch bloß de Zammehalt.
E Gondelfahrt zum Deiwelstee
war eefach intressant un schee.

Gewiß, die Welt hot viel Gesichter.
Ich bin keen Anwalt un keen Richter.
Es duht mich awwer werklich schmerze,
drumm bitt ich eich vun ganzem Herze,
werrn eenich eich, trotz dere Pann,
damit mer werre fahre kann.
Beim Wei mißt mer sich eenich werre.
De Dank is eich gewiß, ehr Herre.