Die Blumme, die scheene, gehöre zum Lewe,
sie bringen de Glanz in die Welt.
Die Blumme, die braucht mer, des isses doch ewe,
sunscht wär eem so manches vergällt.

Un wann mer im Gaarde en Strauß sich kann binne,
so ´n richtiche, wu eem gefallt.
mit Lieb drin, domit kann mer Freinde gewinne,
damit mer de Friede erhalt.

Wer Blumme duht schenke, der werd net gescholte,
do bleibt mer lewendich un wach,
mit Blumme, do kann mer die Welt sich vergolde,
des is doch e herrlichi Sach.

Wie schee isses, wann mer en Feschtdag kann mache
un en Blummestrauß werd eem gebrung,
mit herzliche Glickwinsch, do kann mer noch lache,
des bringt eem so richtich in Schwung.

Die Blumme begeischdern die Leit dorch die Farwe
und wann mer se riecht un so sieht,
do geht eem es Herz uff, verhäälen die Narwe
un des bringt die Sunn ins Gemiet.

Drum schenken eich Blumme,
iwwerwinden die Gräwe
un frään eich solang wie's nor geht.
Die Blumme, die scheene, gehören zum Lewe,
was dann kummt, kummt alles zu speet.