Ich kenn e Esse, gut un billich,
mei Mudder hot des oft gemacht:
Gebreedelte mit Sauermilich,
do hot eem als es Herz gelacht.

Des war so recht no unserm Wille,
un Krumbeere war'n do genunk,
dann hot mer for de Dorscht se stille
e Kummche Schloorem noch getrunk'.

Aach Owwekrischtcher, frisch vum Owwe,
mit Ladwerg ore Grieweschmalz,
die hän die Schdimmung als gehowwe,
des war so ieblich in de Palz.

Hot 's dodezu en Hering gäwwe,
des war en halwe Feierdaa.
's war immer ebbes in de Häwwe
un keener hatt en Grund zu klaa.

Do hot mer sich noch frääe kenne,
die Owweplatt hot als gekracht.
Un wollt die Steinöllamp net brenne,
hot 's Öwweloch mer uffgemacht.

Des war'n noch Zeite, war e Esse,
ehr Leit, des war en wahre Staat.
Mei Lebdag werr ich's net vergesse,
wie kennt ich 's aach? ´s wär jammerschad.