Wann ich an de Himmel guck:
Schdern un Mond dort owe sieh
gebt mers als en schdille Ruck
un ich frooch mich: Wie
kann dann sowas möglich sei,
wer hot des gemacht?
Un des Ganze is so fei
un genaa bedacht.
Wie aach mei Gedanke reife
un des üwerleen,
Nee, des kann ich ned begreife . . .
Dausend Johr vergehn
un noch dausend Johr dezu,
un noch 's selwe werds dann se.
Des Geheimnis losst kee Ruh,
doch in des dringt keener ei.
Ach wie groß is doch die Welt
un de Mensch so klee . . .
Mer hän Schiffe, Gold un Geld,
doch die Welt hot mee.
In de Welt leit Weisheit drinn,
schdilli Harmonie.
Alles was do is hot Sinn
un es basst aach hie.
Nix vergeht, 's bleibt alles do.
Nix is Schei un Bluff.
Was sich ännert, hinneno
geht vun Neiem uff.